Eg er ein intuitiv, vis, leiken, eigenrådig, rar og trygg sjel som elskar å gå i djupet av livet – med ei leiken lettheit og ei open, undrande nysgjerrigheit. Eg er ein livseksperimentør som hentar inspirasjon frå Moder Jord, som lyttar til stilla og lever i kjærleik. Heilt sidan eg var lita, har eg hatt eit nært forhold til det intuitive, det sanselege og det usynlege – og ei stille, men urokkelig kraft har budd i meg: ei djup kjensle av at livet er heilagt, og at vi alle ber på noko unikt og ekte som vil bli levd fram.

Sjølv er eg godt kjend med livets kontrastar. Eg har vandra gjennom mørke landskap – depresjon, meiningsløyse, sjølvhat, djup skam og einsemd – og eg har sett kva som skjer når vi tør å vere der, utan å rømme. Gjennom desse erfaringane har eg ikkje berre møtt mitt eige mørke, men òg funne tilbake til livsgnisten, til gleda over å leve, og til krafta i det å vere sann.

Gjennom heile livet har eg vore sensitiv, intuitiv og klar – både i møte med andre og i mitt eige indre landskap. Eg har lært å stole på denne evna til å lytte, sanse og halde rom. Dette er ikkje berre noko eg har studert – det er noko eg har levd, igjen og igjen. Det er denne livskunnskapen eg no får lov til å dele gjennom SOULSHINE – ein visjon, eit konsept og eit rom der sjela får kome fram, heil og levande.

SOULSHINE er min måte å vere i teneste for det sanne, det ekte og det heilage i mennesket. Her får eg bruke heile meg – det faglege, det intuitive og det erfaringsbaserte – i eit heilskapleg arbeid som handlar om å finne heim. Heim til kroppen. Heim til essensen. Heim til livet.

Min faglege bakgrunn inkluderer pedagogikk, sjukepleie, personlig trening og ein mastergrad i helsefremjande arbeid og helsepsykologi. Eg har alltid vore djupt fascinert av mennesket, av indre liv, av kreativitet, identitet og kva som skaper sann heling. Masterprosjektet mitt utforska korleis kreativitet kan fremje ein sunn identitetsutvikling hos menneske som har erfart internalisert skam – noko eg no utviklar vidare gjennom forsking og skriving.

Eg brenn for at kvar enkelt skal få leve frå sin kjerne. Eg vil løfte fram det unike lyset du ber på – det som ikkje kan målast i prestasjon eller roller, men som lyser sterkast når du er heilt deg.

Så no veit du litt om meg.
Kanskje du kjenner noko vekkjast i deg òg?

Velkomen hit.
Eg er glad du er her.

– Silje